作為個人廠牌『賦音樂』嘅首張專輯，《JTW西遊記》所表現係一個全新嘅方大同。喜愛騷靈方大同嘅樂迷或者會繼<危險世界>後再一次失望，但其實經歷完《回到未來》+《危險世界》兩隻專輯洗禮後，大同嘅樂迷應該都會知佢真正喜愛嘅係乜嘢曲風。
由《Soulboy》《愛愛愛》典定騷靈情歌王子風格，然後以結他主導嘅《15》，再到實驗性質甚強嘅《危險世界》，顯出方大同不甘於定型。對比眾多口講『試新嘢』最後都係K歌嘅歌手，方大同以與時並進嘅方式不斷探索新出路(例如PBR&B)，呢個膽色絕對係好嘅創作人/創作歌手必須要的。
訪問時方大同提到《JTW西遊記》嘅概念係集合多元文化，由Black及Gold雙唱片組合，Black以現代為主軸，Gold則以復古/經典為主題。兩張碟都分別有節拍感強嘅歌亦有＂方＂式情歌。講就講到形象分明，但聽落又點呢？
當我第一次聽完全碟後，第一個感覺係：｢其實兩隻碟無想像中講到咁大分別啫。｣當然我唔係亦唔夠膽話方大同昆水，只不過係所有新嘗試當中加入舊原素。簡單啲講，舊瓶新酒。例如唔用Keyboard做節奏，但係好重舊時代氣味Funk嘅《All Night》。好有懷舊Disco味亦好有Groove嘅《很不低調》。充滿濃厚中國風味嘅<夢蝴蝶》…好似食緊20道Fusion菜一樣。
比較以往方大同嘅大碟，今次名顯係曲詞搭配上有進步。當然小編亦睇過唔少意見覺得今次同《危險世界》一樣，詞嘅部分較弱，而方大同所講嘅概念聽落都唔算好鮮明。但小編覺得概念呢家嘢好死，曲詞先係音樂嘅主軸。《JTW西遊記》碟入20首歌，每首都係上等靚貨，忽略咗本地歌手一段時間嘅樂迷，小編誠意推薦你好好享受呢次西遊記，因為方大同已經表示唔再出原創大碟，暫時退居幕後培育新人兼專注電影事業，希望今次｢西遊記｣唔係Khalil嘅Last Ride啦。
Comments