近年網絡以及社交平台嘅發達，創作人想將自己嘅作品送到大眾眼/耳前比以往有更多方法。獨立廠牌嘅歌手比以前容易見到光。但亦因為咁就產生更多光怪陸離嘅方法短時間吸讚吸負吸like而財源滾滾，真正有貨嘅創作人慢慢開始懷疑自己甚至迷失，始終係創作路上要係「迎合市場」及「忠於自己風格」找尋中間點係所有創作人嘅最大課題。香港人口味變化之大之快係難以捉摸，上年一句「你有free style嗎？」全城hiphop man上身，今年呢？Hip Hop的確唔算係本編杯茶，但每年嘅HK Rap up本編都會一聽再聽，本土Rapper Mastamic出道至今一直忠於一個風格，多年來無大公司支持下都依然屹立於樂壇，當然都有聲音係「根本都無人聽無人理，間唔中出首歌就叫屹立不倒呀？唔好打丁啦。」但其實佢輸出嘅作品一啲都唔少，稍為有睇過Mastamic嘅幾個專訪，幾有「香港仔」味，非常懂得諗方法之餘其實又好了解自己需要以及想做啲乜，當然超強嘅創作力同技巧支持先可以做出色嘅作品。前言太多，番黎本篇重點，磨劍五年出現嘅《MASTAPIECE》，是否真係 「Master Piece」，還只是a piece of….
新專輯嘅元素/曲風/主題比起上一張專輯「流行反擊戰」豐富太多太多，當然近年香港社會所發生嘅事與及網絡生態嘅轉變已經產生千百萬嘅話題。總共十二首作品每首都有唔同主題，某程度反映Mastamic視嘢比以前廣闊同成熟。本編幾喜愛《破地獄》，破地獄原意係打破地獄之門，引領已逝者嘅亡靈早日離開地府進入輪迴，無獨有偶係儀式期間念誦佛經嘅節奏同某啲字句韻尾同Rap又係有啲共通點。內容十分抵死地明串一眾因《內地有說唱》而彈起嘅一眾盡早輪迴，唔好再係凡間玷污Hip Hop文化嘞。聽得過癮之餘加入強烈嘅道教色彩但聽落毫無違和感。可惜嘅係，廣電總局係馬米呢堂法事之前已經封殺該節目嘅續集，間接係厄殺嘻哈文化係內地嘅萌芽。
另一首本編比較喜愛嘅係《Sound of Violence》，內容由「暴力」二字做引題，深入講有關暴力係唔同層面/角度嘅認知，暴力嘅起源又係點，點表現出黎先叫最暴力？暴力本身又有冇分善同惡？面對極端嘅暴力又係咪只能用擁抱同大愛去面對就係善良，還是另類嘅暴力？呢幾年香港人認真要探知同研究嘅大課題。整首曲風加上喃無式rap黎營造壓迫感，有種透唔到氣嘅壓迫，甚至想做出反彈嘅感覺。
其餘嘅作品本編都覺得係高水準之作，上張專輯嘅《Hate Me》典定Mastamic係廣東話rap壇機關鎗之名譽。今張專輯點可能少得同類作品，《Fire》令本編體會「沒有最快，只有更快」嘅Mastamic。當然速度快同咬字清晰只係Rap嘅技巧之一，就算到極緻都唔代表首作品就係好作品。但指細聽Mastamic係flow嘅變化的確係有進步。
碟內其餘嘅作品都顯出Mastamic比上一張專輯嘗試更多唔同嘅風格，內容亦不失多樣化，有諷刺流行文化嘅《DMSPF》，覺得網上同現實世界充斥垃圾但又產生一種畸形化嘅「越廢越紅」嘅生態。有《I.A.D》講及網絡發達人人都可以分身，更可肆無忌憚咁作出網絡欺凌簡接令社會產生更多畸形問題。有為一眾兵仔發聲但曲風又有啲Chill嘅苦情歌《Backseat Love》。有以自己經歷作勵志題材嘅《Not Afraid》，係上一張專輯《Loser》嘅同類型作品，又係featuring唱Pop嘅歌手，今次搵黎欣宜，多啲呢類型嘅Crossover係好事。內容經歷未必完全相同但呢類題材對香港人，尤其係創作人總會搵到共鳴點，當中Mastamic嘅演繹令本編感受到佢對自己所堅持走嘅道路果種無論點都勇往直前，係有啲無管楝嘅。當中有Trap、Urban、Chill、情歌，有快又慢亦有唱，豐富自己曲風之餘又有一種想同樂迷講「我唔做唔係因為我做唔到」果種唔認輸嘅心態。
寫呢篇碟評前做過少少功課，坊間對Mastamic嘅作品都覺得「黎黎去去都係果個Flow」「好悶」「全部都係Hater嘢多過乜」。本編係衷心希望對Mastamic依然有以上睇法嘅樂迷俾多次機會，聽埋呢張《MASTAPIECE》後，對Mastamic再俾多次分。以香港生態，對社會問題/政治政權依然敢言嘅創作者越黎越少，本來Rap嘅出現就係對社會思想同政治表達嘅其中一個方式。覺得Mastamic嘅作品「全部都係Hater嘢多過乜」嘅樂迷，可能係唔想接受太多負面嘢。但又試問一句，當你打開任何一個新聞頻道嘅fb，現今香港社會所發生嘅事有幾多係可以令你唔火？當然除咗態度外，呢張專輯都仲有好多令樂迷細味嘅地方。係咪去到Masterpiece嘅級數本編當然唔夠格評分，但絕對係你CD櫃入邊值得收藏嘅其中一張專輯，《MASTAPIECE》。
Comments